L-Antifona Beate Juliane (1847) ta’ Dr. Paolo Nani

Abstract

Dis-sena għażilt li nlaqqagħkom mal-Antifona Beate Juliane li ġġib id-data tat-22 ta’ Ottubru 1847. Dan ifisser li dis-sena jaħbat għeluq il-165 sena minn meta Mro. Dr. Paolo Nani kiteb dan ix-xogħol. Għaldaqstant, ser niddedika dan l-artiklu għal waħda mill-eqdem teżori prezzjużi li għandna ġo San Ġiljan. Hawnhekk, tajjeb ngħidu li għandna biex inkunu kburin li l-Antifona tagħna hija fost l-ewlenin li ħarġu mill-pinna ta’ das-Surmast! Il-partitura oriġinali, flimkien mal-partijiet tal-orkestra u tal-vuċijiet, illum il-ġurnata jinsabu miżmumin b’għożża kbira fl-arkivju tal-knisja ta’ Lapsi wara li dawn kienu ġew irregalati lill-parroċċa ta’ San Ġiljan minn Mro. Paul Nani (1906-86) innifsu. Nirringrazzja lill-Għaqda Dillettanti Knisja ta’ Lapsi San Ġiljan li tawni l-opportunità tad-deheb li nagħti titwila sewwa u fit-tul lill-antifona biex stajt insawwar dan l-artiklu.