Il-kunsill nazzjonali tal-ktieb 2001-2013 : stħarriġ kritiku tal-ewwel tnax-il sena ta’ ħidma b’risq il-qari

Abstract

Din id-dissertazzjoni tiddokumenta l-ħidma tal-Kunsill Nazzjonali tal-Ktieb (KNK) b’risq il-qari, mit-twaqqif tiegħu fl-2001 sal-2013. Għal dan il-għan saru għadd ta’ intervisti ma’ xi esponenti ewlenin tal-KNK matul dawn l-ewwel tnax-il sena tiegħu. Tirfed dak li nstab mill-intervisti hemm referenza mifruxa: minn minuti li ttieħdu waqt il-laqgħat tal-KNK; għal xi ritratti li ttieħdu waqt l-inizjattivi; u artikli minn gazzetti li jirreklamaw u ġieli jikkritikaw ħidmet il-KNK. Tingħata attenzjoni partikulari lill-akbar żewġ inizjattivi u responsabbiltajiet tal-KNK: il-Premju Nazzjonali tal-Ktieb u l- Fiera Nazzjonali tal-Ktieb. Jissemmew ukoll għadd ta’ proġetti li nbdew u żviluppaw paripassu max-xogħol ewlieni tal-KNK. Iserrep tul din il-ġrajja storika hemm għadd ta’ tqabbil ma’ inizjattivi simili barra minn Malta u ’l hemm u ’l hawn jingħataw għadd ta’ suġġerimenti dwar kif l-inizjattivi differenti jistgħu jħallu effett u impatt akbar fuq l-udjenza Maltija.