It-tagħlim tal-letteratura Maltija fl-ewwel klassi ta' l-iskola sekondarja : il-fehma ta' l-istudenti

Abstract

Dan l-istudju jistħarreġ it-tagħlim tal-letteratura Maltija fl-ewwel klassi ta' l-iskola sekondarja ta' l-Istat mill-perspettiva ta' l-istudenti permezz ta' għadd ta' kwestjonarji u intervisti lill-istudenti f'sitt skejjel, u osservazzjonijiet ta' xi lezzjonijiet tal-letteratura Maltija. Mill-informazzjoni miġbura, ħareġ ċar li hemm differenza bejn il-metodoloġija użata mill-għalliema u x-xewqat ta' l-istudenti. Il-metodu ta' tagħlim użat huwa pjuttost tradizzjonali b'enfasi fuq it-test u l-interpretazzjoni ta' l-għalliem. Min-naħa l-oħra, l-istudenti jixtiequ stil ta' tagħlim aktar parteċipattiv fejn ikunu jistgħu jleħħnu l-opinjonijiet tagħhom u jikkontribwixxu fl-att interpretattiv tal-qari ta' testi letterarji. Filwaqt li ħareġ ċar li r-riżorsi l-aktar imħaddma huma l-bord u l-ktieb skolastiku, l-istudenti wrew ix-xewqa għal firxa akbar ta' riżorsi matul il-fażijiet differenti tal-lezzjoni. Lejn tmiem dan ix-xogħol wieħed isib damma ta' suġġerimenti kif it-tagħlim tal-letteratura jsir iktar effettiv.