Lucjan Pullicino - il-bniedem ta' kull stagun

Abstract

Għad li, Luċjan Pullicino twieled Birkirkara, kien Ġiljaniż minn rasu sa saqajh. Eżatt malli l-familja tiegħu marret toqgħod San Ġiljan, mill-ewwel rabat qalbu ma’ dan is-subborg marittmu u max-xbieha qaddisa ta’ San Ġiljan. Il-Mulej għoġbu jisilfu ħajja twila li matulha Luċjan għaraf jisfruttaha bil-mod kif kien jaf hu għall-benefiċċju, mhux biss tiegħu u ta’ dawk ta’ madwaru, imma wkoll għall-Ġiljaniżi in ġenerali. Hawn min jista’ ma jaqbilx ma’ din id-dikjarazzjoni, imma jibqa’ l-fatt li Luċjan, b’xi mod jew ieħor, irnexxielu jħallielna xi forma ta’ patrimonju warajh. Għaldaqstant, fl-okkażjoni tal-ħames anniversarju mill-mewt ta’ dan il-kompajżan Ġiljaniż qed nagħti bidu għal din is-serje ta’ artikli ta’ xeħta bijografika bil-għan li nesponi kemm nista’ mal-qarrejja ta’ dan il-ktieb il-ħajja, il-ħidma u d-diversi talenti dilettanteski li kien jipposjedi dan il-bniedem xejn pretenzjuż li jiena nqisu ta’ kull staġun. Nieħu din l-okkażjoni biex niżżi ħajr lil Carmen (bint Luċjan) u Ġużi Taylor, lil Tony u Vince Perry, lil Charles u Marie-Thérèse Axiaq, tal-informazzjoni siewja li għoġobhom jgħadduli biex stajt ninseġ il-ħajja mimlija u l-ħidma sfiqa ta’ Luċjan Pullicino. Nirrigrazzja wkoll, lil Niki Papagiorcopula, il-bniedem responsabbli mill-arkivju ta’ Lapsi, biex stajt naċċessja għal xi dokumenti u ritratti li jien ħassejt li huma ta’ rilevanza fir-riċerka tiegħi.