Mro. Antonio Miruzzi (1867-1944) : ġenju mużikali f'qalb il-baned Maltin ta' żmienu

Abstract

Wieħed mill-ħafna kompożituri Maltin u barranin li taw kontribut sostanzjali fit-tixrid tal-arti anġelika tal-mużika f’pajjiżna huwa bla dubju ta’ xejn Mro. Antonio Miruzzi. Ismu huwa aktar marbut mal-baned peress li kellu għadd kbir minnhom taħt idejh u kien jikteb ħafna mużika sabiħa u tal-widna għalihom. Huwa kważi impossibli li ssib banda Maltija li fl-arkivju tagħha m’għandhiex xi xogħol minn tiegħu. Hawn saħansitra baned li għadhom igawdu mill-kompożizzjonijiet tiegħu billi ta’ kull sena jdoqqu xi innu żgħir jew kbir minn tiegħu, jonkella xi marċ funebri li fihom kien tabilħaqq jeċċella. Għaldaqstant, permezz ta’ dan l-artiklu, l-Għaqda Marija Bambina, Banda Vittorja, qed tingħaqad flimkien mal-kumplament tal-baned biex hi wkoll issellem il-ġenju ta’ dan is-surmast Malti fl-okkażjoni ta’ għeluq il-150 sena minn twelidu.