“NgHixu hienja tul il-jiem ...” : studju ta’ awtur fuq Pawlu Mifsud ghall-istudenti fit-tieni sena tal-iskola medja

Abstract

F’din id-dissertazzjoni qed ikun ippreżentat studju ta’ awtur fuq Pawlu Mifsud, kittieb li joffri l-possibbiltà li jiġi studjat minħabba l-medda ta’ ġeneri li kiteb bi skop li jwassal għadd ta’ valuri u gost estetiku lill-qarrejja tiegħu. B’dan l-istudju ta’ awtur l-istudenti mistennija jagħtu r-respons kritiku tagħhom. Tingħata attenzjoni wkoll lill-pedagoġija ta’ xi termini letterarji bażiċi. Dan l-istudju ta’ awtur huwa maqsum f’għaxar lezzjonijiet li jmissu xogħlijiet differenti ta’ Mifsud. Kull lezzjoni tistrieħ fuq pedagoġija sistematika u kreattiva. Fil-bidu ġew intervistati tmien għalliema li qasmu l-fehmiet tagħhom dwar l-idea ta’ studju ta’ awtur u l-pedagoġiji li huma japplikaw fit-tagħlim tat-termini letterarji. Wara, ippreżentajt il-lezzjonijiet bir-riżorsi għal magħhom lil għaxar għalliema oħra li evalwaw ix-xogħol permezz ta’ kwestjonarju. Kelli l-opportunità wkoll li nirrifletti fuq dawn il-lezzjonijiet; għallimt żewġ lezzjonijiet ma’ klassi tat-tieni sena tal-iskola medja. Mill-analiżi tal-informazzjoni miġbura ħarġet ix-xewqa li jibdew jiġu rikonoxxuti awturi oħra minn dak issuġġerixxit fis-sillabu sa issa. Barra minn hekk, tqajmet kuxjenza fuq il-bżonn ta’ pedagoġija iktar sistematika għat-tagħlim tat-termini letterarji fejn l-istudent jitpoġġa fiċ-ċentru tat-tagħlim u jagħmel it-termini tiegħu b’taħriġiet u prattika f’kuntesti reali.