Xi xogħlijiet fir-repertorju vast ta’ Mro. Antonio Miruzzi (1867–1944) : mija u ħamsin sena minn twelidu

Abstract

F’Malta, dis-sena, id-dinja bandistika qed tiċċelebra l-150 anniversarju mit-twelid ta’ wieħed mill-kompożituri l-aktar prolifiċi u versatili li qatt rat Malta. Dan huwa Mro. Antonio Miruzzi (10.x.1867 – 23.x.1944), imwieled il-Furjana, u li għex u miet il-Ħamrun. Xi darba jew oħra, kull banda Maltija u Għawdxija daqqet xi xogħol jew ieħor minn tiegħu, sew jekk hu xi marċ brijuż, funebri, reliġjuż, sinfoniku, jew trionfali, jew xi innu tal-banda, popolari, jew solenni, xi fantasija, kapriċċ, melodija, overtura, jew sinfonija, jonkella xi danza, galopp, gavotta, kwadrilja, mażurka, passo doppio, polka, valz, jew xi tip ieħor ta’ mużika ballabbli. Uħud minn xogħlijietu ġew ippremjati f’konkorsi internazzjonali, saħansitra ppubblikati. F’karriera twila ta’ ‘l fuq minn erbgħin sena bejn l-aħħar deċennju tas-seklu dsatax u l-bidu tat-tletinijiet tas-seklu l-ieħor, Miruzzi kien surmast-direttur ta’ għadd ġmielu ta’ baned u entitajiet mużikali oħra. Kien ukoll magħruf ħafna bħala għalliem ta’ ħila kbira u direttur tal-banda mill-aqwa. Dan l-artiklu huwa ntiż li jdewwaq lill-qarrej ftit mill-ħafna u ħafna xogħlijiet li ħarġu mill-pinna inimitabbli tiegħu.