Il-perjodu ingliż mill-1800 sas-Sette Giugno fir-raba' klassi tal-esperjenza letterarja

Abstract

F'din id-dissertazzjoni analizzajt ir-rabta li hemm bejn il-letteratura u l-Istorja, b'referenza partikulari għal-letteratura Maltija bi sfond tal-perjodu Ingliż mill-wasla ta' dawn il-ħakkiema sas-Sette Giugno. Din l-analiżi tista' tintuża fir-raba' klassi tal-iskola sekondarja. Minbarra stħarriġ kritiku bażiku ta' xi testi letterari bi sfond tal-perjodu Ingliż, ippreżentajt linji ta' gwida prattiċi biex l-għalliema tal-letteratura Maltija jkunu jistgħu jagħżlu aħjar siltiet ta' din ix-xorta. Dan għamiltu fid-dawl tal-prinċipji u l-għanijiet tal-Kurrikulu Minimu Nazzjonali u mal-Iskaluni tal-esperjenza letterarja. Dan kollu jsib il-milja tiegħu f'ġabra ta' lezzjonijiet, flimkien ma' riżorsi għal magħhom, li għamilt b'rabta mat-tema magħżula. B'hekk, konxja mill-influwenza li għandha l-Istorja fuq il-letteratura, l-għalliema jkunu jistgħu jużaw metodi li jwessgħu r-rispons letterarju u jsaħħu t-tiswir tal-komunità ta' interpreti, filwaqt li l-istudenti jiksbu għarfien akbar tal-Istorja ta' Malta. Dawn il-proposti evalwajthom permezz tar-riflessjoni kritika fuq il-prattika tiegħi stess meta esperimentajt xi lezzjonijiet fi skejjel sekondarji u ġbart l-opinjoni ta' xi għalliema tal-Malti ta' esperjenza li osservawni ngħallem uħud minnhom, u permezz ta' kwestjonarju li qassamt lill-istudenti li kienu fil-klassi.