Mro. Antonio Miruzzi u Soċjeta Filarmonika ‘La Vincitrice’

Abstract

Kif inhu xieraq, f’dis-sena partikolari, għadd ta’ baned qed jiċċelebraw bil-kbir l-anniversarju mit-twelid ta’ Mro. Antonio Miruzzi li kien wieħed mill-kompożituri l-aktar prolifiċi li qatt rat Malta fil-qasam bandistiku. Fir-riċerka dejjem għaddejja tiegħi fuq ħajtu u ħidmietu, huwa kważi impossibli li wieħed jirnexxilu jiġbor lista sħiħa ta’ xogħlijietu. Dan peress li, uħud minnhom lanqas biss nafu li kitibhom hu jew li huma tiegħu, u oħrajn spiċċaw intilfu jew inqerdu darb’ għal dejjem. Mill-banda l-oħra, qed insib għajnuna kbira min-naħa ta’ dawk is-soċjetajiet tal-banda li f’xi żmien jew ieħor kellhom lil Mro. Antonio Miruzzi bħala surmast-direttur tagħhom. Ma’ kull banda li huwa kien magħha żgur li b’xi mod ħalla l-impronta tiegħu, f’dak li huwa tagħlim, direzzjoni tal-banda u bċejjeċ mużikali. B’xorti tajba, għadd imdaqqas minn dax-xogħlijiet jinsabu merfugħin b’għożża kbira f’diversi arkivji tal-banda mxerrdin mal-gżejjer Maltin. Il-pinna mgħallma tiegħu tant kienet waħda sabiħa u tal-widna, li uħud mix-xogħlijiet tiegħu, kbar u żgħar, għandhom jindaqqu sal-ġurnata tal-lum fosthom, innijiet kbar u popolari, marċi brijużi, kif ukoll funebri.