Il-qniepen taghna

Abstract

IL-knisja tagħna sa mill-bidu nett kellha xi qniepen. Minn żmien għal żmien kienu jbiddlu jew iżidu xi qanpiena oħra, imma qatt ma kellhom sett suriet in-nies. Għalhekk , meta kienu qed jibnu l-knisja l-ġdida, 1805-1815, il-patrijiet riedu li jagħmlu sett li jkun jixraq lit-tempju l-ġdid . Fil-fatt dawn ma kienux ħlief tlaqqita ta' sitt qniepen magħmula minn diversi brunżara, waħda akbar mill-oħra bla ebda akkordju armoniku bejniethom. Barra minn dan , matul l-aħħar gwerra dinjija, iż-żewġ qniepen li kien jagħtu għall-barra , fuq il-faċċata tal-knisja , il-kbira u r-raba' waħda , ġarrbu ħsara kbira u kienu perikolużi ħafna ; tant li xi waqtiet kellna nħalluhom siekta! Għalhekk wara li spiċċat il-gwerra, fi Frar ta' l-1947 , il-patrijiet tal-kunvent tagħna tal-Belt għoġobhom jgħażluni pirjol tal-kunvent tagħhom . Imħeġġeġ minn bosta parruċċani tagħna , tħajjart inġib sett ġdid ta' sitt qniepen fuq akkordju modern li kien jixraq lill-Knisja tagħna. Ħabat li dak iż-żmien kien għadu kemm inġieb mill-Ingilterra għal-knisja parrokkjali ta' Ħal Lija , minn għand id-ditta magħrufa ta' John Taylor & Co., ta' Loughborough, sett ġdid li ngħoġob ħafna għall-armonija u l-ħlewwa ta' l-ilħna tagħhom .