Il-Perspettiva tal-għalliema u l-istudenti dwar is-sillabu tal-Malti għall-eżami taċ-ĊES

Abstract

Din id-dissertazzjoni se tistħarreġ il-perspettivi tal-għalliema u l-istudenti dwar is-sillabu tal-Malti għall-eżami taċ-ĊES bl-għan li tagħti leħen lil dawn il-parteċipanti li jistgħu joffru kontribut siewi fid-dawl tas-sillabu tal-Malti fil-ħames sena fil-livell sekondarju. Dan l-istudju sar f'erba' skejjel tal-istat u erba' skejjel tal-Knisja. Sabiex niġbor l-informazzjoni, għamilt użu mit-teknika trijangolari, fejn intużaw kemm metodi kwantitattivi kif ukoll metodi kwalitattivi. Bħala metodu kwantitattiv għamilt użu mill-kwestjonarju filwaqt li bħala metodu kwalitattiv għamilt użu mill-intervista. Mir-riżultati miksuba jidher li jinħass il-bżonn li s-sillabu jiffoka iktar fuq il-ħtiġijiet tal-istudenti u li l-għalliema jkollhom iktar sehem fit-tfassil tas-sillabu nnifsu. Barra minn hekk, jidher ċar li kemm l-għalliema kif ukoll l-istudenti jemmnu li s-sillabu tal-Malti għall-eżami taċ-ĊES huwa vast wisq u li ħafna drabi jispiċċaw jagħmlu ġirja mal-ħin biex jilħqu jlestu l-kontenut kollu sal-ġurnata tal-eżami. Kemm l-għalliema kif ukoll l-istudenti jaqblu li l-ħiliet u l-oqsma kollha tal-ilsien Malti għandhom jingħataw l-istess importanza fis-sillabu, biex ma' tmiem l-edukazzjoni sekondarja jkunu kisbu għarfien tajjeb ta' kull ħila u qasam. Dwar it-testi letterarji jinħass il-bżonn li dawn ikunu magħżula minn persuni li jkollhom għarfien sod u mifrux tal-letteratura biex ix-xogħol li jintgħażel ikun addattat għall-adolexxenti. Dan l-istudju jagħlaq b'xi suġġerimenti biex jitjieb it-tfassil tas-sillabu għall-eżami tal-Malti fil-livell taċ-ĊES.