Traduzzjoni u analizi tad-dramm Bodas de sangre ta’ Federico Garcia Lorca

Abstract

Dan l-istudju huwa bbażat fuq it-traduzzjoni ta’ Bodas de Sangre miktub mid-drammaturgu Spanjol Federico García Lorca. Għażilt li nidħol għal din il-biċċa xogħol għaliex minn dejjem kien jolqotni l-mod kif jikteb u t-temi reali li jittratta García Lorca, infatti, ħafna minn xogħlijietu huma mera tas-soċjetà li kien jgħix fiha. L-iskop ewlieni hu li tinħoloq verżjoni bil-Malti, sabiex tingħalaq it-triloġija tradotta bil-Malti tad-drammi ta’ García Lorca. Ittieħed f’kunsiderazzjoni wkoll iċ-ċans li ’l quddiem, din it-traduzzjoni tkun tista’ tintuża bħala skript sabiex tittella’ fuq il-palk Malti. Se jkunu qed jingħataw ukoll għadd ta’ noti fl-aħħar tat-Tielet Kapitlu fejn se jiġu spjegati ċerti raġunijiet, deċiżjonijiet u għażliet li ttieħdu. Dawn jistgħu jservu wkoll bħala linji gwida għal min jixtieq jifhem ċerti kunċetti aktar mill-qrib. Naturalment, biex ix-xogħol prattiku jsir bl-aħjar mod, għandu jkun hemm ir-riċerka. Din it-teżi għandha l-għan li tixħet iktar dawl fuq il-qasam tat-traduzzjoni teatrali. Infatti, se jkunu qed jiġu mistħarrġa t-teoriji ewlenin dwar it-traduzzjoni tad-drama u l-poeżija kif ukoll xi punti meqjusa bħala problematiċi mit-teoristi fejn tidħol it-traduzzjoni għall-palk. L-għan ta’ din it-traduzzjoni hu li jitwassal l-istess sens, bid-deskrizzjonijiet u d-dettalji kif kitibhom u ddeskrivihom Federico García Lorca nnifsu, imma f’lingwa differenti.