Miruzzi twieled f'Marzu

Abstract

Kull darba li kont niġi biex nikteb xi ħaġa dwar ħajjet is-surmast Antonio Miruzzi mhux dejjem sibt l-informazzjoni kollha li xtaqt mill-kotba. Il-fatt biss li Miruzzi twieled fit-tieni nofs tas-seklu 19 u miet fl-ewwel nofs tas-seklu 20 diġà jagħmilhielek diffiċli ħafna għal biex tikseb xi forma ta’ dokumentazzjoni. Hemm ċerti kotba oħrajn, bħal ngħidu aħna Musica e Musicisti in Malta: Saggio (1932) ta’ Dr. U. Rolandi, Mużiċisti Kompożituri Maltin u Għawdxin tal-Bieraħ u tal-Lum (1951) u Dizzjunarju Bijo-Biblijografiku Nazzjonali (1960) ta’ R. Mifsud Bonnici, u The Great Maltese Composers – Historical Context, Lives, and Works (2016) ta’ J. Vella Bondin, li kważi jew xejn ma jġibu dwaru. Madankollu, nistqarr li l-kitbiet ta’ J. Mifsud Matrenza (1918-2013), l-istorjografu ewlieni tal-Banda Ġużeppina Ħamruniża, sibthom t’għajnuna kbira għax kif jgħid hu stess: ‘Jiena kelli bosta okkażjonijiet li nitkellem miegħu dwar il-ħajja mużikali tiegħu u kont niskanta kif kien isib ħin għat-tagħlim tal-istudenti, għall-kunċerti (provi) tal-allievi, għat-tħejjijiet ta’ programmi u għal mijiet ta’ kompożizzjonijiet mużikali li kiteb’.