It-teatru f'San Giljan : it-tieni parti

Abstract

Wara li spiċċat il-Gwerra, feġġet il-qawsalla tal-paċi u l-affarijiet f’pajjiżna bdew ġejjin lura għan-normal. F’kull belt u raħal bdew jinbnew ċentri parrokkjali bis-swali u teatru magħhom, reġgħu bdew jinfetħu, jew jinfetħu swali ġodda taċ-ċinema, tal-ballu u divertimenti oħra. Twaqqfu għaqdiet ġodda reliġjużi filwaqt li oħrajn qodma reġgħu bdew jiffunzjonaw fosthom, l-Azzjoni Kattolika. Bdew jitwaqqfu wkoll ċentri ċiviċi, sportivi, u x’naf jien. In-nies riedet toħroġ mix-xeltrijiet mudlama u minflok tibda tiddeverti u taljena rasha biex tnessi l-kruhat li ġabet magħha l-Gwerra. U f’kemm ilni ngħid, l-attività soċjali bdiet tirranka ruħha. Bini li kien iġġarraf b’qillet l-għadu, inħatt u nbena mill-ġdid u miegħu bdew tielgħin binjiet oħra fi stil aktar modern fosthom, xi lukandi lussużi. Il-pajjiż u l-infrastruttura tiegħu bdew jqumu ftit ftit fuq saqajhom. Dan kien il-bidu ta’ rebbiegħa ġdida għal Malta. Ma setax jonqos li, is-subborg ta’ San Ġiljan ma jinħakimx ukoll minn din il-mewġa ġdida. F’dan l-artiklu ser inkompli nlaqqagħkom ma’ aktar attività teatrali ġo San Ġiljan, l-aktar permezz tal-Melita Open Air Theatre u t-twaqqif tal-Kumpanija Filodrammatika San Ġiljan ta’ Luċjan Pullicino.