L-inni-marċi mill-pinna ta’ Mro. Willie Attard

Abstract

F’dal-artiklu għażilt li nlaqqagħkom ma’ żewġ inni-marċi tas-surmast Willie Attard – Inno Marcia ‘La Vittoria’ (1932), għall-banda Melliħija li ġġib l-istess isem, u l-Inno Marcia ‘San Gejtanu’ (1947), għall-banda Ġużeppina Ħamruniża. Minn dal-innijiet kiteb oħrajn: wieħed għall-banda ‘San Gabriel’ ta’ Ħal Balzan, u ieħor bl-isem ta’ ‘Lil San Ġużepp’, għall-banda Ħamruniża fuq versi tal-Avukat Anton Buttiġieġ, fl-okkażjoni tal-50 anniversarju mit-twaqqif tagħha fl-1939. Kiteb ukoll innijiet popolari, fosthom ‘Lil Banda La Vittoria’, fuq versi tal-Avukat Ġorġ Żammit, fl-okkażjoni tal-50 anniversarju mit-twaqqif tagħha. Il-ħsieb li nlaqqagħkom ma’ daż-żewġ xogħlijiet hu biex ngħin lil qarrej jagħraf xi stil sabiħ kien jaf iħaddem Mro. Attard fix-xogħlijiet tiegħu. Fl-istess waqt, nagħti prova kemm il-mużika ta’ das-surmast kienet u għadha tabilħaqq tingħoġob minn dawk kollha li għandhom għall-qalbhom l-baned Maltin. Nieħu dil-okkażjoni biex nirringrazzja lis-Sur Joe Cauchi, segretarju ġenerali tas-Soċjetà, talli għoġbu jgħaddili xi partijiet mill-innu-marċ La Vittoria biex stajt ninseġ dal-artiklu. Ħajr ukoll lill-Kaptan Twanny Attard, iben is-surmast, tat-tagħrif addizzjonali li għoġbu jgħaddili dwar l-innu-marċ San Gejtanu wara li kont intervistajtu fis-26 ta’ Awwissu, 2016, u tal-fotokopja tal-partitura oriġinali li għoġbu jirregalali. Kopja oriġinali ta’ dal-innu-marċ tinsab merfugħa fl-arkivji tal-Katidral tal-Imdina.