Malta u l-Maltin fir-registri tal-Kustodja tal-Art Imqaddsa

Abstract

Xi snin ilu jien u t-tifel morna pellegrinaġġ lejn l-Art Imqaddsa. Kellna bħala mexxej spiritwali u gwida lil Patri Noel Muscat li dak iż-żmien kien Surmast tal-istudenti Franġiskani fis-seminarju tagħhom f ’San Salvatur f ’Ġerusalemm, kif ukoll Professur tagħhom. Tiskanta x’impressjoni tista’ tieħu tal-gwida, imma l-atteġġjament u d-dedikazzjoni tiegħu ispirawni biex noffri s-servizzi tiegħi bħala Professur tal-Latin u tal-Grieg lill-Kustodja tal-Art Imqaddsa. L-opportunità ġiet meta offrewli li naħdem b’mod voluntarju fl-Arkivju li hemm f’San Salvatur, proprju bieb ’il hemm mill-uffiċċju tal-Kustodju. Xogħoli kien li għal 40 jum nittraskrivi l-ewwel reġistru tal-Franġiskani fl-Art Imqaddsa li jissejjaħ “Ordinazzjonijiet”, jiġifieri, ordnijiet li l-Kustodji kienu jagħtu, u affarijiet oħra. Wara din l-esperjenza, jiena bqajt immur hemm kull sajf, u ġa ttraskrivejt tliet reġistri ħoxnin, kull wieħed fi tliet ġimgħat. Dan ix-xogħol ma nemminx li kien seta’ jsir mingħajr l-għajnuna spiritwali ta’ kuljum li kont nirċievi fis-Santu Sepulkru fil-quddiesa kantata tal- Franġiskani.