L-ezorcizmi ta' Gesu' fil-vangelu skont San Mark (1)

Abstract

Matul din is-Sena Liturġika (B), fil-Ħdud ta’ Matul is-Sena jinqara l-Vanġelu skont San Mark. L-istudji tal-Vanġeli juru li kien l-ewwel wieħed li nkiteb; il-ġrajjiet li fih jiġu rrakkuntati juru tajjeb li huma frott min verament kien għex u għamel esperjenza diretta ta’ Ġesù; mill-ġrajjiet irrakkuntati wieħed jista’ jmiss aktar b’idejh lil Ġesù tal-istorja. Barra minn hekk, l-istudji profondi li saru fuq San Mark ħarġu aktar għad-dawl il-kapaċità tal-awtur, kemm bħala kittieb, kif ukoll bħala teologu tajjeb li għaraf jagħġen tajjeb it-tradizzjonijiet kollha li ġew mgħoddija lilu. Għaġna tajba li wasslet biex ikollna f ’idejna Vanġelu tassew ħaj li jurina ftit ftit min hu verament Ġesù, u dan fil-kuntest ta’ ideat teoloġiċi fundamentali li fuqhom huwa mlaqqam il-Vanġelu: il-persuna ta’ Ġesù, is-Saltna ta’Alla, kif tagħraf lil Ġesù, il-ħtieġa tal-fidi, il-qawwa tat-talb, id-dixxepolat eċċ.