It-tifsir tan-numri fil-Bibbja

Abstract

Fil-Bibbja niltaqgħu ma’ ħafna simboli dwar Alla, dwar il-bniedem, dwar l-annimali; niltaqgħu mas-simboliżmu li jinvolvi l-kuluri u anke dak tannumri li nsejħulu aritmetiku. Naraw in-numru 666 jirreferi għal Neruni (ara Apok 13:17- 18) u huwa marbut mal- Antikrist, in-numru sebgħa li juri totalità fejn dan jissemma ħafna drabi fl-Apokalissi ta’ San Ġwann għas-seba’ knejjes, seba’ siġilli, seba’ ittri, seba’ bwieqi, seba’ trombi u seba’ kwiekeb. Insibu n-numru 1000 għal Alla u juri milja f’Alla, in-numru 10 li juri perfezzjoni divina u fuq kollox in-numru 12 għat-tribujiet u l-appostli. In-numru 3 li juri perfezzjoni spiritwali waqt li n-numru 4 juri perfezzjoni materjali, in-numru 6 juri imperfezzjoni, u n-numru simboliku ta’ 144,000 li nsibu f ’Apok 14:1 li jfisser il-multiplikazzjoni tat-12-il tribù (jiġifieri l-Antik Testment) u t-12-il appostlu (il-Ġdid Testment) li jiffurmaw il-poplu wieħed ta’ Alla (in-numru 1000). Għalhekk se nagħtu ħarsa ħafifa lejn xi numri sinifikattivi fil-Bibbja.