L-ikonografija nisranija tas-Salib : mill-aspett umiljanti għall-aspett trijonfali

Abstract

Fl-Evanġelju ma nsibu l-ebda referenza għad-dehra fiżika ta' Ġesu. Minflok, l-Evanġelisti kitbu dwar xi wħud mill-ġrajjiet marbutin mal-ħajja ta' Ġesu, fosthom il-ġrajja tal-passjoni u l-mewt tiegħu fuq is-Salib, ġrajja ta' mistħija kbira fil-kultura tad-dinja antika. Bil-mod il-mod, iżda s-Salib ħa tifsira ġdida sakemm għal dawk kollha li emmnu f'Ġesu, sar is-simbolu teoloġiku ewlieni. F'dan l-artiklu ser inħarsu lejn kif l-ikonografija nisranija tas-Salib ħadet iż-żmien tagħha biex żviluppat din ix-xbieha ta' umiljazzjoni fi xbieha ta' trijonf. Filwaqt li ser nagħmlu dan, ser nillimitaw ruħna għall-ewwel tnax-il seklu tal-Kristjaneżmu. Kif ser naraw, din il-bidla fil-perspettiva ikonografika nisranija seħħet permezz tal-Imperatur Kostantinu u ta' ommu Sant'Elena, li għenu ħafna sabiex il-Kristjaneżmu jieħu rotta ġdida li qatt qabel l-Insara tal-bidu ma kienu ħolmu dwarha.