Fortizzi Erodjani fid-dezert : Makeronte fil-Gordanja

Abstract

Ir-re Erodi l-Kbir (74 q.K.–4 w.K.) kien ċertament tirann krudil, imma baqa’ magħruf għall-proġetti grandjużi ta’ monumenti li bena. Hu reġa’ bena t-Tempju ta’ Ġerusalemm fuq skala aktar majestuża fis-snin 20-19 q.K., u l-bini tal-btieħi u l-portiċi kompla matul kważi nofs seklu (cfr. Ġw 2,20). Hu bena palazz mill-isbaħ fit-Torri ta’ David jew iċ-Ċittadella, fuq ix-xaqliba tal-punent ta’ Ġerusalemm, u l-fdalijiet tattliet torrijiet kbar iddedikati għal ħuh Phasael, għal martu Mariamme u għal ħabibu Hyppicus wieħed għadu jista’ jammirahom sallum fil-foss li hemm fl-istess Ċittadella maġenb il-Bieb ta’ Ġaffa. Erodi bena wkoll port artifiċjali mill-isbaħ fit-Torri ta’ Straton fuq il-kosta tal- Mediterran, u semma’ dan il-port Ċesarija Marittima.