40 sena mill- wasla tal- vara titular tas- SSMA trinita’ fil- Marsa

Abstract

Id-data tas-27 t'Ottubru 1979 tibqa' mnaqqxa f' qalb il- Marsin, jew dawk bħali ta' nisel Marsi, b'ittri tad-deheb. Dakinhar rajna għall-ewwel darba l-vara titulari skolpita fl-injam li kellha tieħu post dik proviżorja li kienet intużat fl-ewwel żewġ purċissjonijiet b~vara proċessjonali tas-Santissima Trinità tas-snin 1978 u 1979. Il-proċess inbeda f'Ħadd it-Trinità tal-5 ta' Gunju 1977. Kienet ilha tberren snin f'moħħ il-Marsin ix-xewqa li dawn fil festa titulari tagħhom ikunu jistgħu jiffesteġġjaw bħall-parroċċi l-oħrajn bi statwa titulari. Nista' ngħid b'wiċċi bil-quddiem li dan ma sar bl-ebda fini li jnaqqas il-qima tal-poplu Marsi lejn is-Santissmu Sagrament tal- Artal!

Kien żmien li fih il-festa titulari kienet reġgħet qed tqum f' dak li hu entużjażmu tal-poplu. Kien għalhekk li grupp ta' Marsin li kienu konvinti aktar minn qatt qabel li kien wasal iż- żmien biex eventwalment jitolbu lill-awtoritajiet ekleżjastiċi biex jingħataw il-permess għal vara titulari proċessjonali, ġiet idea li fil-fatt waslet biex titwettaq. Dan il-grupp ta' rġiel entużjasti, mill-Għaqda Festi Esterni SSma Trinità - Marsa, wettgu dak li kellu jkun il-preludju' biex issir din it-talba formali.