Mro Miruzzi miet f'Ottubru 1944

Abstract

Sentejn ilu ħabat il-150 sena mit-twelid ta’ Mro Antonio Miruzzi (1867-1944), wieħed mill-aqwa surmastrijiet tal-banda li qatt kellha Malta bejn l-aħħar tas-seklu 19 u l-ewwel tliet deċennji tas-seklu 20. Fost l-għadd kbir ta’ baned li hu mexxa nsibu s-Soċjetà Mużikali San Piju X ta’ Ħal Lija. Fl-1906 kien strumentali ħafna biex ittrasforma lis-Soċjetà Mandolinistika ‘Fior d’Arancio’ fil-banda Lijana kif nafuha llum. Miruzzi kien iddimetta minn surmast fl-1926, wara servizz ta’ 20 sena sħaħ, minħabba li kien għeja bit-tagħbija tax-xogħol u tas-snin. Fl-artiklu tas-sena l-oħra wkoll, tajna prova dokumentata li permezz tagħha stabbilixxejna darba għal dejjem id-data eżatta ta’ twelidu. U peress li dis-sena jaħbat il-75 anniversarju minn mewtu, xieraq li niċċelebraw ’il dal-kompożitur prolifiku Malti billi nkomplu nitkellmu fuq ħajtu u ħidmietu, u l-ħafna u ħafna xogħlijiet bandistiċi li ħallielna bħala patrimonju. Ħasra li għas-Soċjetà Mużikali Lijana, tneħħi l-Innu Solenni lil Ġesù Salvatur u l-Innu lis-Salvatur, ma fadal xejn tiegħu; xogħlijietu kienu nqerdu bil-Gwerra.