Isimhom jgħix għal dejjem

Abstract

125 Sena tat-Tqegħid ta' l-Ewwel Ġebla tal-Knisja Tagħna 3 ta Ġunju 1877- 3 ta' Ġunju 2002 Il-ħruġ tad-digriet ta' Mons. Arċisqof Carmelo Xikluna nissel sens ta' urġenza biex jinbeda x-xogħol fl-iqsar żmien possibbli għall-bini tal-knisja. Ir-Rev. Dun Pawl Vella skond ir-Rit Pontifikali, qiegħed salib kbir ta' l-injam fejn kellu jkun l -altar maġġur. Il-Kumitat għażel dan, biex issir fl-20 ta' Mejju 1877. F'din il-ġurnata waslet il-banda mużikali ta' Birkirkara u qagħdet iddoqq sakemm bdiet il-funzjoni. Dun Pawl Vella wasal fuq il-post u qiegħed is-salib ta' l-injam filwaqt li l-banda daqqet l-innu tal-Papa. Dun Pawl, f'kelmtejn minn tiegħu fakkar li din hija ġrajja importanti għax l-art li fuqha kienu, ġiet iddedikata lil Alla. Din kellha tkun ir-raba' knisja ddedikata lil Marija fTas-Sliema.