Il-kult lejn is-Sultana tal-Qalb ta’ Ġesù fil-gżira u d-djoċesi ta’ Għawdex

Abstract

Il-qima lejn il-Madonna fil-gżira ta' Għawdex kienet is-suġġett ta' diversi studji matul iż-żminijiet; biżżejjed ngħidu li ġieli kien hemm min irrefera għall-gżira tat-tliet għoljiet bħala 'il-gżira tal-Madonna' u dan bir-raġun għaliex mhux biss Għawdex għandu ismu marbut mar-rivelazzjoni tal-Madonna f'Ta' Pinu lil Karmni Grima, imma l-Knisja Katidrali kif ukoll ħames knejjes parrokkjali - dawk taż-Żebbuġ, ta' Kerċem, ix-Xagħra, l-Għarb u Għajnsielem huma ddedikati lill-Madonna taħt titli differenti. Dan biex ma nsemmux il-kult qadim lejn l-Immakulata Kunċizzjoni b'rabta mas-santwarju tagħha fil-Qala, kif ukoll l-istess kult fil-Knisja ta' San Franġisk tar-Rabat, Għawdex, il-knisja tal-Madonna tal-Karmnu fix-Xlendi u diversi santwarji oħra Marjani mxerrdin mal-gżira.