Mill-istorja tal-Kungressi Ewkaristici Internazzjonali

Abstract

Kungress Ewkaristiku Internazzjonali hu laqgħa kbira ta' lajċi, saċerdoti, isqfijiet, arċisqfijiet u kardinali, immexxijin minn Legat tal-Papa, miġburin flimkien mid-dinja kollha bil-ħsieb li jagħtu l-ikbar ġieħ u glorja lill-Ewkaristija. Jiltaqgħu lkoll flimkien biex jaraw kif isibu mezzi ta' kif ikabbru dejjem iżjed għarfien u mħabba lejn dan is-Sagrament adorabbli li hu l-ikbar teżor li għandha Ommna l-Knisja Mqaddsa.

F'April tal-1913 iltaqa' f'Malta l-24 Kungress Ewkaristiku Internazzjonali. Jigi allura li f'April tas-sena d-dieħla, dan il-Kungress se jagħlaq mitt sena li jkun ilu li sar fostna. Kienet ġrajja li nisslet festi kbar fost il-poplu Malti ta' mitt sena ilu iżda żgur dawk li ferħu l-iżjed kienu l-Mostin u dan għax ir-Rotunda għażiża tagħna kienet intgħażlet biex fiha jsiru l-laqgħat ta' dan il-Kungress. It-tifkira ta' dan kollu tagħtina okkażjoni mill-isbaħ biex ngħidu xi ħaga dwar il-bidu ta' dawn il-Kungressi u dwar kif bil-mod il-mod, xterdu mal-ibliet ewlenin tal-pajjiżi fil-ħames kontinenti tad-dinja.