L-Opra Soċjali tal-Knisja f"Malta permezz ta' l-istituti tat-Tfal. ca. 1880-1945

Abstract

Matul iż-żminijiet, il-Knisja għenet lis-soċjeta` b'diversi modi. Din il-kitba titratta dwar il-qadi tal-Knisja fil-ħidma ta' l-istituti tat-tfal. Iż-żmien magħżul għal dan is-suġġett hu dak ta' bejn it-tmiem tas-seklu dsatax u l-bidu tas-seklu għoxrin għaliex f'Malta bdew jimbtu ħafna istituti biex jgħinu lill-familji fil-bżonn. Biex tidher il-ħidma tal-Knisja permezz ta' l-istituti tat-tfal, inħass il-bżonn li tingħata l-qagħda soċjali tal-familja Maltija fl-imgħoddi biex hekk il-qarrej jidħol fid-dinja ta' dak iż-żmien. Għal dan il-għan ġie ddedikat l-ewwel kapitlu. It-tieni kapitlu jintroduċi lill-istituti tat-tfal f'Malta bid-dettalji kollha dwarhom. Il-ftit storja li ngħatat dwar kull wiehed minnhom tgħin biex wiehed jifhem li ghalkemm dawn se jiġu trattati flimkien, kull wiehed hu distint u uniku fil-ħidma tieghu. L-aħħar u l-itwal kapitlu, imbagħad, jitratta dwar il-ħidma propja ta' l-istituti u dan imsejjes l-aktar fuq it-tagħrif li nstab fl-arkivji privati ta' l-istituti. Għar-raġuni ta' organizzazjoni, dan il-kapitlu tqassam fi tliet partijiet. L-ewwel sezzjoni turi x'kien il-għan ewlieni ta' l-istituti, it-tieni kif jintlahaq dan il-għan u t-tielet kemm intlaħaq il-għan. Dawn il-kapitli kollha flimkien joħorġu b'mod ċar il-ħidma soċjali tal-knisja f'Malta u l-effett sostanzjali tagħha.