Il-qawmien tal-Maltin kontra l-Franċiżi - (1798-1800)

Abstract

Din is-sena qegħdin infakkru l-200 sena mill-wasla f'Malta tal-Franċiżi. Din hi ġrajja ta' patrijottiżmu kbir. Ikun għajb għalina jekk inħalluha għaddejja qisu ma ġara xejn. Il-Kunsilli Lokali ta' dawk il-postijiet li kienu storikament involuti dak inhar, għandhom ifakkru lil nieshom li taw sehemhom f'din il-ġrajja. Nixtieq infakkar din il-ġrajja u sehem Sta. Venera, bħala lokal li fih ukoll seħħew xi ġrajjiet importanti fl-istorja ta' pajjiżna. Ħafna ġie miktub fuq dan l-episodju mill-istorja ta' Malta. Ħafna minn dak li ġie miktub huwa diffiċli biex tifirdu minn dak li hu leġġenda jew verita' storika. Tneħħi xi ftit dokumenti 'l hawn u 'l hinn fil-Bibljoteka Nazzjonali u mkejjen oħra, għal ħafna żmien, l-istorja ta' dawk is-sentejn - żmien ta' tixwix, taqlib u taqbid, inżammet ħajja fostna permezz ta' (a) tifkiriet ta' min kiteb u x'għadda minn għalih u (b) minn għajdut. Però kollha jixhdu l-qlubija ta' missirijietna.