Il-knisja tal-Madonna tal-Mensija

Abstract

Din il-knisja hija waħda mhux tas-soltu. Fil-fatt din hija knisja li tinstab ġo għar taħt il-livell tat-triq li mir-raħal l-antik tal-Imsieraħ kienet tieħdok għall-inħawi ta' San Ġiljan. Dawn it-tip ta' knejjes jissejħu trogloditi u kienu l-ewwel forma ta' knejjes li bdew jiġu organizzati fil-bidu li r-reliġjon Kristjana bdiet tistabbilixxi ruħa madwar il-baċċin tal-Mediterran. Minkejja dan ma teżisti l-ebda evidenza li l-oriġini ta' din il-knisja jmur lura sal-ewwel żmien meta r-reliġjon Nisranija kienet qegħda tinfirex mal-gżejjer Maltin. Jingħad li din l-għar kienet mibdula fi knisja fi żmien il-Medjuevu, meta f'pajjiżna naraw li kienet drawwa li tinbeda devozjoni ġo xi għar, eżempju l-Madonna tal-Għar fir-Rabat ta' Malta u l-Għar ta' San Martin fil-limiti tal-Imġarr ta' Malta.