Il-pellegrinaġġ ta’ Dun Anton

Abstract

Dawk li ilhom joqogħdu fit-triq ewlenija ta' San Ġwann, Triq in-Naxxar, li dari, flimkien ma' ftit toroq oħra laterali, kienet tifforma dak li kien magħruf bħala l-Imsieraħ, żgur li huma midħla sew ta' dan il-pellegrinaġġ. Dan għaliex nhar Ħadd il-Passjoni, filgħodu kmieni, qabel biss tkun telgħet ix-xemx, imdorrijin jisimgħu dak it-tgedwid ta' nies jitolbu waqt li għaddejjin b'pass imgħaġġel u meqjus ġej mill-bogħod, li mbagħad jibda dejjem iżid. Xi wħud minnhom, maż-żmien, forsi tħajru jingħaqdu ma' dawn in-nies, u jaqbdu minn ħdejn bwiebhom ma' dan is-serbut ta' pellegrini, fi triq twila li twassalhom fis-santwarju għażiż tal-Madonna tal-Mellieħa. U allura, dawk li jafu b' dan il-pellegrinaġġ, ma jistax ikun li ma jafux ukoll bil-mibki Dun Anton Sciberras, li għal aktar minn erbgħin sena kien il-moħħ u l-magna wara dan l-att ta' fidi mżewweġ mas-sagrifiċċju.