Niltaqgħu ma' Joe Friggieri : studju t'awtur għar-raba' sena fi skola sekondarja

Abstract

Din id-dissertazzjoni tippreżenta studju t'awtur fuq Joe Friggieri awtur ta' ġeneri differenti - mifrux fuq għaxar lezzjonijiet maqbuda f'unità. Ingħataw għadd ta' kriterji u prinċipji dwar l-idea ta' studju t'awtur fil-livell sekondarju. Saret għażla ta' madwar għaxar testi letterarji ta' Joe Friggieri, bl-għan li l-istudenti jsiru midħla tal-awtur u l-produzzjoni letterarja tiegħu. Xi lezzjonijiet twettqu fil-prattika fi skola sekondarja mal-istudenti tar-raba' sena. Bħala evalwazzjoni ġew intervistati seba' għalliema, tqassam kwestjonarju lil madwar ħamsin studenta, u irriflettejt fuq il-passi kollha bħala r-riċerkatur. Mit-tweġibiet miġbura jidher ċar li studju t'awtur huwa mod prattiku ta' kif unità kurrikulari speċifikata tħalli l-frott tagħha fit-tagħlim tal-Malti. Għaldaqstant proġett bħal dan jista' jservi ta' gwida lill-għalliema kemm-il darba jieħdu l-inizjattiva biex iwettqu studju ta' awtur fil-klassi u fl-istess ħin ikomplu jikkontribwixxu fit-tisħiħ tat-tagħlim tal-letteratura Maltija.