Dixxerniment, akkumpanjament u integrazzjoni : ghajnuna biex inwettquhom fil-prattika

Abstract

Dan il-ktieb jindika direzzjoni pastorali. It-tliet kelmiet “akkumpanjament”, “dixxerniment” u “integrazzjoni” huma l-kriterji biex neżerċitaw attenzjoni pastorali mimlija ħniena u kuraġġ lejn il-miżżewġin kollha, inklużi dawk li jinsabu f ’qagħda kumplessa ta’ relazzjoni. L-isforz pastorali tagħna hu li nħaddmu l-loġika tal-ħniena pastorali ma’ dawk li qegħdin jgħixu f ’sitwazzjonijiet “irregolari.” Dan l-atteġġjament pastorali “jagħtina f ’idejna kwadru u klima li jżommuna milli niżviluppaw morali kiesħa tal-iskrivanija meta niġu biex nittrattaw it-temi l-iżjed delikati, imma pjuttost iqegħduna fil-kuntest ta’ dixxerniment pastorali mimli mħabba ħanina, li dejjem issibha lesta tifhem, taħfer, issieħeb, tittama, u fuq kollox tintegra. Din hi l-loġika li għandha tirbaħ fil-Knisja” (AL 312). Permezz ta’ normi pastorali nistgħu bi mħabba u serenità nidħlu fil-qalba tad-dramma tal-persuni u nidħlu fiż-żarbun tagħhom sabiex ngħinuhom jgħixu aħjar u jagħrfu x’inhi r-rieda t’Alla għalihom f’dawk iċ-ċirkustanzi partikolari u x’inhu posthom fil-Knisja.