San Ġużepp fil-kitbiet mistiċi

Abstract

Dan l-artiklu sejjer jittratta r-riferenza għal San Ġużepp li nsibu fil-kitbiet ta’ xi wħud mill-mistiċi. Ilkoll nafu li l-ħajjiet tal-qaddisin u tal-mistiċi, kif ukoll ilkitbiet tagħhom, huma mimlija b’evidenza ta’ devozzjoni lejn San Ġużepp. Santa Tereża ta’ Avila tirrakkonta kif, meta kienet tgħix fil-Kunvent tal-Inkarnazzjoni ġo Avila, kienet mardet marda li pparalizzatha u kienu ħasbuha li mietet. Hi talbet lil San Ġużepp, u tgħid li kien bl-interċessjoni tiegħu li fieqet. Tereża dejjem qisitu bħala avukat u Sinjur tagħha, u kienet tirrakkomanda lilha nnifisha lilu b’ħafna ħerqa, u tgħid li ħelisha minn ħafna inkwiet, kemm tar-ruħ u kemm tal-ġisem, u li qatt ma rrifjutalha xejn. Imma Tereża ta’ Avila ma kinitx l-unika mistika li kienet devota ta’ San Ġużepp. Xi qaddisin u mistiċi ħallewlna wkoll talb indirizzati lilu. Hemm imbagħad oħrajn, uħud minnhom qaddisin kanonizzati, jew beati, li jgħidu li kellhom ix-xorti li jaraw lil San Ġużepp f ’viżjonijiet li huma kellhom. Forsi l-aktar magħrufa minn dawn l-uħud hija l-Beata Anna Katarina Emmerich (1774–1824) li se nitkellmu dwarha aktar ’il quddiem. Tajjeb li, qabel wieħed jikkunsidra l-kitbiet ta’ dawn l-uħud, nagħmlu xi riflessjonijiet li jirrigwardaw il-psikoloġija ta’ dawn il-mistiċi.