Storjografija Maltija : studju kritiku fuq xi nuqqasijiet li niltaqgħu magħhom fl-istorja ta' Malta, b'referenza għal xi storiċi ta' pajjiżna

Abstract

Ma hix ħaġa ħafifa biex tagħti definizzjoni u l-ħila li tagħmel dan "tiġi biss bl-esperjenza". Madankollu kull definizzjoni tista' tkun ta' għajnuna kbira biex wieħed ifisser ħsebijietu sewwa u skond ma' jgħid Schiller, l-ewwel skop ta' kull definizzjoni hu li jiċċara s-suġġett li wieħed ikun jitkellem fuqu. Fl-istess ħin, l-ebda definizzjoni ma tista' tkun għal kollox eżatta, imma minn waqt għall-iehor tista' tiġi modifikata. Wieħed mis-suġġetti l-aktar diffiċli biex tagħti tifsira tiegħu hu l-Istorja. Mil-lat etimoloġiku, il-kelma 'storja' ġejja mill-Grieg u tfisser 'tfittix'. L-Istorja, mela, fis-sens ġenera li tal-kelma, hija xorta ta' tfittix jew mistoqsija. L-istorja għalkemm ma tistax issejħilha għal kollox xjenza, għandha minn din ta' l-aħħar. L-istoriku jsaqsi xi mistoqsijiet u jipprova jagħti tweġiba għalihom. L-istorja għalhekk għandha bħala l-għan tagħha t-tkixxif ta' ħwejjeġ mistura fiż-żmenijiet. Ta' liema xorta huma dawn il-ħwejjeġ li l-istorja tipprova tiċċara? Mhux l-istoriċi kollha jaqblu fuq it-tweġiba għal din il-mistoqsija.