Stedina għat-tagħlim fis-sekondarja

Abstract

Is-sejħa għat-tagħlim tal-Maltin kollha għandha storja li taf il-bidu tagħha fi 'Stedina' (1841) li għamel Mikiel Anton Vassalli. L-isem stess tal-ktieb tagħna Stedina għat-Tagħlim fis-Sekondarja xtaqnieh jidwi l-invit ta' Vassalli. Aħna qed nibnu fuq il-kisbiet li għamlu nies oħra matul iż-żmien, kisbiet li bis-saħħa tagħhom l-ilsien Malti minn djalett beda jissejjaħ ilsien, kisbiet li wasslu biex il-Maltin jiksbu kuxjenza ta' l-identità tagħhom u jissejħu nazzjon, u biex il-Malti minn ilsien imwarrab ikun mgħallem fl-iskejjel u f'kull livell ta' l-edukazzjoni. B'dan il-ktieb nixtiequ nqiegħdu s-sisien għat-tagħlim tal-Malti fuq il-prinċipji tat-tagħlim ta' l-ewwel lingwa, u skond ir-riċerka li saret f'dan il-qasam b'mod xjentifiku f'dawn l-aħħar snin. Spiċċa ż-żmien fejn il-Malti jistrieħ fuq l-imħabba ta' xi individwi aktar milli fuq il-professjonalità li hemm bżonn f'kull qasam, inkluża l-pedagoġija. Illum aktar minn qabel, hemm bżonn min ixammar il-kmiem u jidħol b'ruħu u b' ġismu għall-istudju u t-tagħlim tal-Malti fl-ogħla livelli. B'hekk biss lilsien Malti jista' jissaħħaħ u jibqa' jkollu futur.