Siġar u pjanti : kalendarju ta' żriegħ, taħwil u tagħrif ieħor li għandu jsir kull xahar

Abstract

Għaddew ħdax-il sena mit-tielet ħarġa ta' dan il-ktieb. F'dan iż-żmien l-imħabba għas-Siġar u l-Pjanti kotrot b'mod li llum, min m'għandux roqgħa ħamrija fejn iħawwel xitla, qed jara fejn ser iqiegħed qsari jew ħwat biex ikollu x-xitel u l-pjanti fil-kmamar tad-dar. Ngħid għalija dan iqawwili qalbi u nieħu pjaċir li l-ħsieb ta' kull wieħed u waħda minna huwa mwaħħad f'moħħ kulhadd biex inkabbru u nżidu dejjem aktar is-siġar u l-pjanti fil-ġonna u d-djar tagħna. Iżda ħaġa li ngħid is-sew tnikkitni ħafna hi li tisma' lil xi wħud jgħidu li m'għandhomx xorti fit-tkabbir tax-xitel u l-pjanti. Iġibu elf skuża għaliex jaħsbu li l-pjanti għandhom ma jiġux 'il quddiem. Sa l-għajn tal-ġara teħel inkella li tal-ħanut ma jkunx tahom pjanti f'saħħithom. Iżda r-raġuni li dawk ix-xitel u l-pjanti ma jmorrux 'il quddiem u aktarx imutu, ma tkunx l-għajn jew xi ħaġa oħra li dak li jkun iwaħħal fiha. Ir-raġuni tabilhaqq tkun in-nuqqas ta' għarfien fit-tkabbir ta' dik ix-xitla jew pjanta li tkun. Ftit huma dawk li jafu ż-żmien sewwa ta' meta għandna nnisslu l-pjanti, meta u kif niżbru s-siġar tagħna, tisqija, sustanzi u dak kollu li jeħtieġ isir biex ikollna Siġar u Pjanti tabilhaqq f'saħħithom u ma jonqoshom xejn. Hawn min jaqbad ma' ktieb ingliż, taljan jew b 'xi lsien ieħor miktub għall-klima u l-qagħda ta' dak il-pajjiż barrani. Ma jarax jekk it-tagħrif li hemm miktub fil-ktieb jgħoddx għall-klima semi tropikali li għandna aħna. Jgħoddx għall-Gżira żgħira mdawra bil-baħar u maħkuma mir-raxx mielaħ tiegħu. Il-ħsieb ta' dan il-ktieb hu dak li dawk kollha delettant tas-Siġar u Pjanti, isibu t-tagħrif meħtieġ ta' kif u meta għandhom jiżirgħu, iħawlu, ibixxu u mitħaġa oħra li jeħtieġ inkunu nafu matul kull xahar fit-tkabbir tas-Siġar u l-Pjanti fil-Gżejjer maltin.