Ir-rettili u l-amfibji tal-gżejjer Maltin

Abstract

In-nuqqas ta' tagħrif xjentifiku dwar ir-rettili u l-amfibji tal-gżejjer Maltin joħloq vojt kbir, vojt li l-biċċa l-kbira tiegħu huwa mimli b'tagħrif imsejjes fuq nofs veritajiet, ħrejjef u għajdut. Kien dan it-tagħrif li wassal biex jinkiteb li l-gremxula ta' Filfla għandha żewġt idnieb, jew li Malta ma hawnx sriep velenużi minħabba l-wasla ta' San Pawl fil-gżejjer Maltin. Wara li tħabbru r-regolamenti dwar il-ħarsien tar-rettili u ftit wara anke taż-żrinġ, inħasset il-ħtieġa li jkun hawn tagħrif popolari bil-Malti, imsejjes fuq tagħrif xjentifiku, dwar ir-rettili u l-amfibji Maltin. Dan kemm biex ikun hemm tagħrif korrett fuq dawn il-ħlejjaq, kif ukoll biex ma jkunx hawn il-bżonn li wieħed ifittex tagħrif f'kitbiet barranin li mhux bilfors ikun kollu korrett meta wieħed japplikah għall-ispeċi li jinstabu hawn Malta. Wieħed jittama li dan il-materjal jiftaħ it-triq għal apprezzament pożittiv li jwassal biex dawn il-ħlejjaq ikunu jistgħu jkomplu joktru bla biża', bla persekuzzjoni u bla periklu, iżda bir-rispett tagħna lkoll, li magħhom naqsmu din l-art. Nixtiequ nirringrazzjaw lil Andrew Micallef li kien responsabbli għat-tpinġijiet kollha f'din il-pubblikazzjoni, u lil Manwel Mifsud li qara l-manuskritt bir-reqqa għal xi żbalji ta' l-ortografija. Nixtiequ nuru l-apprezzament tagħna ukoll lis-Segretarjat għall-Ambjent għall-għajnuna tiegħu fil-pubblikazzjoni ta' dan il-materjal, u lis-Soċjetà għall-Istudju u l-Ħarsien tan-Natura li għoġobhom jinkarigawna minn dan ix-xogħol.