Kultura fis-‘Sagħtar’ : bibljografija ta' l-artikli li dehru fl-ewwel mitt ħarġa tar-rivista ‘Sagħtar’, Jannar 1971 - Jannar 1984

Abstract

Din il-Bibljografija hija ġabra ta’ l-artikli li nkitbu fir-rivista ‘Sagħtar’ fl-ewwel mitt ħarġa tagħha, jiġifieri minn Jannar 1971 sa Jannar 1984. Din hija mqassma sena b’sena f’diversi suġġetti topiċi fejn wieħed l-ewwel jista’ jsib il-kunjom u l-isem ta’ l-awtur u l-artiklu li huwa kiteb flimkien man-numru tal-ħarġa u d-data ta’ pubblikazzjoni, kif ukoll in-numru tal-paġna jew numru tal-qoxra fejn jinsab l-artiklu. F’uħud mid-daħliet, fejn l-awtur ma kienx magħruf dan beda biss mit-titlu ta’ l-artiklu. Dan kollu sar b’mod alfebitku kemm tas-suġġett kif ukoll ta’ l-awtur jew artiklu. Fuq wara wieħed jista’ jsib werrej ta’ diversi sensiliet li dehru fir-rivista ‘Sagħtar’ fis-suġġetti differenti. In-numru li hemm wara kull titlu jirreferi għan-numru tal-ħarġa. L-għan ta’ din il-Bibljografija huwa li jgħin li kull min jixtieq isir jaf x’inkiteb f’dawn l-ewwel mitt ħarġa tar-rivista ‘Sagħtar’ speċjalment lil dawk l-istudenti li jixtiequ jfittxu tagħrif għal xi proġett jew studju tagħhom. ‘Sagħtar’ hija rivista kulturali popolari ma’ bosta studenti fi skejjel Maltin. Fiha wieħed jista’ jsib kull sura ta’ tagħrif dwar il-kultura Maltija ta’ kull żmien. Il-letteratura, l-istorja, l-arti u oqsma kulturali oħra huma mħalltin flimkien minn xahar għal ieħor. Din ir-rivista li toħroġ kważi f’kull xahar skolastiku tas-sena ilha toħroġ ghal dawn l-aħħar sitta u għoxrin sena mingħajr waqfien.