Sunett 'Lil Marija Annunzjata' tal-qassis-poeta Dun Anton Xiberras f'għeluq il-100 sena minn twelidu

Abstract

Għad li ta’ kull sena fil-kotba tal-festa joħorġu għexieren t’artikli b’tema letterarja, mużikali, jew xort’oħra mill-pinna tiegħi, din hi l-ewwel darba li tħajjart nikteb wieħed ukoll għall-festa tal-Lunzjata. Għal dis-sena ħsibt li nikteb xi ħaġa dwar sunett ta’ Dun Anton Xiberras (1922-2006) f’ġieħ Marija Annunzjata ċċelebrata fil-parroċċa ta’ Ħal Tarxien. Dal-qassis-poeta Naxxari – li dis-sena jagħlaq 100 sena minn twelidu, proprju fit-13 t’April – kiteb għadd bla qies ta’ xogħlijiet letterarji ta’ kull xorta bħalm’huma poeżiji, novelli u leġġendi, li ħafna minnhom jittrattaw il-missjoni peress li din kienet bil-wisq għal qalbu sa minn ċkunitu. Tant hu hekk, li għal żmien twil kien Teżorier Nazzjonali fl-Uffiċċju Missjunarju u editur tal-perjodiku ‘Malta Missjunarja’, li dis-sena wkoll inzerta qed jagħlaq disgħin sena ħajja minn mindu ħareġ l-ewwel għadd tiegħu f’Settembru tal-1932. Is-sunett li se nitkellem fuqu nkiteb fi Frar tal-1946, jiġifieri xhur biss wara tmiem il-Gwerra, u li allura jista’ jitqies fl-istess ħin bħala għanja Marjana u talba ta’ radd il-ħajr, li bl-interċessjoni ta’ Madonna, il-poplu Malti, minkejja l-ġuħ, l-għaks u t-tbatija kbira li sofra intortament, ħelisha b’wiċċ il-ġid.