Nhar l-Erbgħa 30 ta’ Ottubru 2024 iltqajna fis-Sala 247 flimkien ma’ żewġ rappreżentanti ta’ kull partit. Il-moderatriċi kienet studenta tat-tieni sena. 

Ġew ippreżentati sett ta’ mistoqsijiet lilll-kontestanti kollha u kull wieħed u waħda minnhom wieġbu billi saħqu fuq il-viżjoni tagħhom fil-konfront tal-Kulleġġ. 

Kien hemm udjenza ta’ studenti u kellhom iċ-ċans illi jsaqsu l-mistoqsijiet ukoll. Uħud minnhom sfidaw ukoll il-viżjonijiet tal-kontestanti.

Kollox ma’ kollox kienet sessjoni tajba fejn ħareġ il-potenzjal ta’ wħud mill-kontestanti bħala kelliema żgħażagħ li għandhom il-ħila jipproġettaw u jleħħnu l-ħsibijiet tagħhom. 

Waqt id-dibattitu ġiet imħeġġa atmosfera pożittiva u kostruttiva fejn ħadd ma ħassu intimidat. 

Nawguraw lil dawn iż-żgħażagħ u nħeġġuhom jibqgħu sodi fil-fehmiet tagħhom u li ma jirrepetux l-istess retorika li spiss toffri l-politika nazzjonali ta’ pajjiżna iżda li jrawmu vuċi differenti u jsibu l-kuraġġ iwassluha u jwettquha.