[EN]
Ġie ffirmat Ftehim ta’ Kollaborazzjoni bejn l-Università ta’ Malta u l-Għaqda Każini tal-Banda. Ir-Rettur, il-Professur Alfred J. Vella, iffirma f’isem l-Università ta’ Malta (UM), filwaqt li l-Għaqda Każini tal-Banda kienet irrappreżentata mill-President Onorarju tagħha, Dr Noel Camilleri, u s-Segretarju Onorarju tagħha, is-Sur Joseph C. Azzopardi.
Ġie ffirmat Ftehim ta’ Kollaborazzjoni bejn l-Università ta’ Malta u l-Għaqda Każini tal-Banda. Ir-Rettur, il-Professur Alfred J. Vella, iffirma f’isem l-Università ta’ Malta (UM), filwaqt li l-Għaqda Każini tal-Banda kienet irrappreżentata mill-President Onorarju tagħha, Dr Noel Camilleri, u s-Segretarju Onorarju tagħha, is-Sur Joseph C. Azzopardi.
Permezz ta’ dan il-Ftehim, l-Università ta’ Malta għandha l-għan li tistabbilixxi Diploma fil-Wind Band Studies li se tiġi offruta mid-Dipartiment għall-Istudju tal-Mużika fl-Iskola tal-Arti Performattiva. Mill-banda l-oħra l-Għaqda Każini tal-Banda reġgħet ikkonfermat l-impenn tagħha li tipprovdi appoġġ loġistiku u prattiku għall-implimentazzjoni tad-Diploma, li ser tkun fuq bażi ta’ sentejn part-time. Il-kollaborazzjoni bejn iż-żewġ Partijiet hija mmirata lejn it-twettiq u tħaddim b’suċċess tad-Diploma.
Id-Diploma fil-Wind Band Studies hija prinċipalment maħsuba għal mużiċisti li jew huma involuti b’mod attiv fid-diversi rwoli mużikali ta’ orkestra ta’ strumenti tan-nifs (wind bands), bħalma huma d-daqq, it-tagħlim u d-direzzjoni, jew li qegħdin jaħsbu li jimpenjaw ruħħom f’dawn l-irwoli. Madankollu, dan il-kors huwa flessibbli biżżejjed biex jilqa’ studenti minn sfondi u esperjenzi mużikali differenti li huma interessati li jiżviluppaw il-ħiliet mużikali kreattivi tagħhom, u li qegħdin ifittxu li jiksbu l-għarfien u l-għodda sabiex jimpenjaw ruħhom b’mod kritiku mad-diversi esperjenzi mużikali li, b’mod jew ieħor, jirrelataw mad-dinja tal-wind bands.
Il-Programm ta’ Studju fil-livell ta’ Diploma se jinkludi żewġ perijodi ta’ xogħol prattiku li jkunu obbligatorji għall-istudenti u għandhom l-għan li jipprovdu lill-istudenti bl-opportunità li jesperjenzaw il-prattika tal-orkestra fuq il-post ma’ membru tal-Għaqda. Studenti li jiksbu suċċess fl-għoti tad-Diploma jkunu eliġibbli li japplikaw għal-lawrja ta’ Bachelor of Music (Honours) tal-Università ta’ Malta jew il-Higher Diploma ladarba din tkun imwaqqfa. Iżda, sabiex applikanti jkunu jistgħu jirreġistraw għal-lawrja ta’ Bachelor of Music (Hons), dawn iridu wkoll jissodisfaw ir-rekwiżiti ġenerali għall-ammissjoni kif speċifikat fir-Regolamenti għad-Dħul tal-Università ta’ Malta.
