Hekk kif qed toqrob l-edizzjoni li jmiss tax-Xjenza fil-Belt – nhar il-Ġimgħa li gejja - mis-6pm ‘l quddiem fil-Belt Valletta, qed nisimgħu ħafna dwar ix-xjenza, l-arti u l-kreattività. Iżda għaliex hu daqshekk importanti li t-tfal tagħna jkunu esposti għax-xjenza u l-arti minn età żgħira?
Matul il-festival, tfal ta’ kull età se jgawdu għadd ta’ attivitajiet li jkattru l-immaġinazzjoni u jrawmu ħsieb kreattiv. Fi Spazju Kreattiv, Kids Dig Science hu taħlita ta’ teatru interattiv u esperimenti xjentifiċi u logħob, li jippermetti lit-tfal li jesploraw u jiskopru. Jitgħallmu kif isolvu problemi b’mod kreattiv.
Fis-City Lights, l-Orkidea hu xow teatrali interattiv bl-użu ta’ shadow puppets organizzat mill-NGO Greenhouse Malta. Se joffri lil tfal żgħar l-opportunità li jesploraw il-garrigue ta’ Malta u jifhmu l-kriżi tal-orkidej f’Malta. Huma jkunu jistgħu joħorġu b’soluzzjonijiet dwar kif jistgħu jaħdmu biex iħarsuhom.
Esplora ser tippreżenta shadow puppet ieħor fejn tfal ta’ bejn l-5 u t-12-il sena jimbarkaw fuq vjaġġ fl-istorja ta’ Malta matul iż-żmienijiet. Shadows of Malta's Times, li se jintwera fil-La Valette Band Club, se jelenka r-rabtiet bejn ix-xjenza u l-kultura, u kif dawn effetwaw lil xulxin. L-ewwel wirja tibda fis-6.45pm.
L-attività favorita tax-Xjenza fil-Belt fost it-tfal ta’ kull età hi STEAM², fejn l-Organizzazzjonijiet tal-Istudenti mill-Università ta’ Malta litteralment jimlew Pjazza San Ġorġ b'esperimenti, logħob, kwizzijiet u installazzjonijiet interattivi tal-arti.
Il-Fiera tax-Xjenza fid-Daħla tal-Belt ser tospita 15-il organizzazzjoni b'firxa inkredibbli ta’ attivitajiet, wirjiet interattivi, terremoti, dud u insetti, ħut u speċi oħra ta’ taħt il-baħar, siġġu tar-roti, karozzi, u ħafna aktar. F’din iż-żona għal żgħażagħ u adulti insibu l-istudenti tal-MCAST li se jippreżentaw wirja ta’ esperimenti, kif ukoll juru l-għodda u l-applikazzjonijiet tax-xjenza avvanzati tagħhom. Il-Junior College tal-Università ta' Malta se jingħaqad għall-ewwel darba fil-festival b'mod spettakolari bl-orkestra tagħhom idoqq live.
L-Istitut Kulturali Taljan se jospita attivitajiet interessanti ħafna. Is-Socjeta’ tal-Fotografija ta’ Malta se tispjega kif jintuża d-dawl biex jinħolqu kapolavuri. It-tfal ikunu jistghu jaraw l-istilel waqt li jitgħallmu dwar pjaneti u jiddentifikaw id-debris spazjali biex jipproteğu s-satelliti. Riċerkaturi mill-Istitut tax-Xjenza Spazjali u l-organizzazzjoni Kids in Orbit juru kif jaħdmu t-teleskopji u l-viżitaturi se jkunu jistgħu jaraw oġġetti spazjali bħall-pjaneti ta’ Jupiter kif ukoll għadd ta’ stilel.
Dawn huma xi attivitajiet ewlenin iżda mhux l-uniċi għat-tfal matul is-serata. Għall-programm sħiħ idħol fis-sit: www.scienceinthecity.org.mt jew segwi l-paġna ta’ Facebook.
Il-Festival Xjenza fil-Belt - Lejla tar-Riċerkaturi Ewropej hu ffinanzjat mill-Azzjonijiet Marie Skłodowska-Curie tal-Programm Horizon 2020 (H2020, 2014-2020) tal-UE. Il-festival jitmexxa mill-Università ta’ Malta, mill-Kamra Maltija tal-Xjenzati u mill-Fond tar-Riċerka tal-Università (RIDT), bi sħubija mal-Fondazzjoni Valletta 2018, is-Segretarju Parlamentari għas-Servizzi Finanzjarji, Ekonomija Diġitali u Innovazzjoni, MCAST, Esplora, JUGS Ltd, Studio 7, BPC International, GSD Marketing Ltd, Aquabiotech Ltd, MEUSAC, PBS, Spazju Kreativ, Pjazza Teatru Rjal, il-Kunsill Lokali tal-Belt Valletta, Notte Bianca, Melita, More or Less Theatre, Trasport Malta u l-Kunsill Malti għall-Arti.