Kun parti mill-ikbar festival ta’ xjenza u l-arti f’Malta
Ix-Xjenza fil-Belt qed ifittex nies biex jingħaqdu mal-programm tagħhom ta’ voluntiera għall-2018
Għal seba’ snin, il-festival ix-Xjenza fil-Belt, ilu jibni pont bejn ir-riċerkaturi u l-artisti, billi jorganizza lejl spettakolari. Xogħlijiet tal-arti impressjonanti, ispirati mill-iktar riċerka riċenti f’Malta saru sinonimi mal-lewn maġenta tal-logo tal-festival. Ftit tassew jafu li dan hu possibbli biss grazzi għal tim żgħir ta’ individwi ddedikati, numru dejjem jikber ta' msieħba, u mijiet ta’ voluntiera.
Il-Maniġer tal-Proġett ta’ x-Xjenza fil-Belt Dr Edward Duca qal: “Il-festival ta’ din is-sena, bit-tema tiegħu li x-Xjenza hi Kultura, għandu wieħed mill-aqwa. Ilna naħdmu ħafna fuq it-tfassil ta’ programm mill-isbaħ għal dawn l-aħħar sentejn. B'aktar minn 80 imsieħeb u stima ta' 30,000 viżitatur, tassew neħtieġu l-għajnuna kollha li nistgħu niksbu. Qegħdin infittxu nies entużjasti ta’ kull età u mis-setturi kollha tas-soċjetà biex fit-28 ta' Settembru jingħaqdu magħna, u jkunu parti minn din l-inizjattiva nazzjonali.”
Il-voluntiera jistgħu jagħżlu li jkunu parti minn għadd ta’ opportunitajiet matul dak il-lejl. Dawn jinkludu, li jilqgħu u jinfurmaw lill-viżitaturi, iwettqu riċerka u evalwazzjoni, jikkomunikaw tagħrif dwar l-avvenimenti, fotografija, u ħafna aktar. Li persuna toffri li tkun volontier matul ix-Xjenza fil-Belt se tkun qed tgħin biex tiżviluppa ħiliet ġodda, fosthom sessjonijiet ta' taħriġ mill-organizzaturi, ix-xogħol volontarju nnifsu, u billi tiltaqa’ ma’ professjonisti interessanti minn oqsma differenti. Dawk l-individwi li jixtiequ jkunu involuti fil-festival ix-Xjenza fil-Belt jistgħu jagħmlu dan billi jingħaqdu mal-programm ta’ volontarjat. Din se tkun tassew esperjenza memorabbli għalihom.
Kull min hu interessat li jkun voluntier matul ix-Xjenza fil-Belt, jista’ japplika onlajn.
Aktar tagħrif jinkiseb permezz ta’ imejl lil info@scienceinthecity.org.mt jew mill-paġna ta’ Facebook: Science in the City, Malta.
Ix-Xjenza fil-Belt isir kull sena bħala parti minn inizjattiva pan-Ewropea bl-isem ta’ Lejl tar-Riċerkaturi Ewropej appoġġjat minn Horizon 2020 tal-UE u GSD Marketing Ltd. Xjenza fil-Belt hi kkoordinata mill-Università ta' Malta, il-Kamra Maltija tax-Xjenzati, bi sħubija mal-Fond għar-Riċerka tal-Università (RIDT). L-edizzjoni tal-2018 qed issir b'kollaborazzjoni mal-Fondazzjoni Valletta 2018, u bosta msieħba oħra.