It-teknika tal-fallaċja patetika fir-romantiċiżmu bikri : Vassallo, Muscat Azzopardi u Psaila

Abstract

Din it-teżina tanalizza t-teknika tal-fallaċja patetika (jew it-taqriqa patetika kif isejħulha xi kritiċi) fi tliet poeti tal-perjodu Romantiku bikri f’Malta: Ġan Anton Vassallo, Ġużè Muscat Azzopardi, u Dun Karm Psaila. Minkejja li għall-ewwel dan it-terminu ntuża b’ton dispreġjattiv, maż-żmien sar meqjus bħala strateġija ewlenija tal-lirika Romantika. Bħala teknika fiha ħafna aspetti funzjonali u effettivi li jikkontribwixxu biex is-sentiment jew il-ħsus tal-jien liriku, flimkien ma’ sfumaturi tematiċi, jiġu esternalizzati fl-ambjent, li b’konsegwenza ta’ dan il-proċess isir atmosfera, jiġifieri, taħlita straordinarja ta’ post u ħsus. Għalhekk, jintwera kif elementi tal-pajsaġġ – fosthom l-ilwien, il-klima, it-temperatura u proċessi u xejriet materjali oħra tal-ambjent – isiru suġġestivi ħafna, tant li jerfgħu fihom inferenzi u implikazzjonijiet dwar sentiment uman li jkun qiegħed jikkorrispondi magħhom. B’dan il-mod, dan l-istudju juri kif ir-rappreżentazzjoni Romantika tal-ambjent qatt mhi newtrali għax dejjem titgħabba b’din il-qawwa suġġestiva. Dan jidher effettivament fitt-tliet poeti mistħarrġa li, bl-idjomi liriċi rispettivi tagħhom, jibnu dan it-tip ta’ pajsaġġ atmosferiku u, jiffurmaw tendenza Romantika waħda u komprensiva fejn jidħol l-ambjent suġġestiv.