Tarżan u l-udjenza tiegħu f' "Il-Ġnien" ta' Henry Holland

Abstract

Il-kritika letterarja tiffoka, fost l-oħrajn, fuq it-test bħala xogħol li jeżisti fi djalettika kontinwa bejn l-elementi, biex ngħidu hekk "fiżiċi," tat-test, u l-qarrejja, jiġifieri dawk li minn sensiela ta' kelmiet u spazji fuq il-karta, jew minn sensiela ta' ħsejjes waqt qari jew rappreżentazzjoni joħolqu xogħol artistiku dinamiku li jimraħ ferm lilhinn minn dak li jidher jew jinstema' dak il-ħin. Ħafna mill-analiżi tal-letteratura Maltija għadha maħkuma mill-idea li t-test kif jidher fuq il-paġna huwa "innoċenti" u meta taqrah m'għandekx "iddaħħal" jew tqis elementi li bħallikieku huma "mdendlin" miegħu imma mhumiex parti minnu, bħall-istorja jew l-ideoloġija tal-persuna li kitbitu, jew l-esperjenzi ġodda u dejjem jinbidlu li jġibu magħhom il-qarrejja meta jiltaqgħu mat-test. F'dan il-qari ta' "Il-Ġnien" ta' Henry Holland, poeżija li dehret għall-ewwel darba fl- 1998, se tingħata attenzjoni lil dawn ir-realtajiet li fil-fatt jinsabu fil-qalba tat-test, u lis-sehem determinanti tal-qarrejja fil-kreazzjoni u r-rikreazzjoni kontinwa tat-test. [Silta mill-artiklu]