Introduzzjonijiet motivanti għal-lezzjonijiet tal-grammatika permezz tal-umoriżmu

Abstract

L-għan ewlieni ta’ din ir-riċerka kien li nipprovdi l-idea kif l-umoriżmu u ċ-ċajt jistgħu jservu ta’ introduzzjoni motivanti għal-lezzjoni tal-grammatika. Minn dan l-iskop ħareġ it-tieni għan tal-istudju, jiġifieri li nuri kif iċ-ċajt jista’ jipprovdi kuntest għall-ewwel fażi tal-proċess tat-tinqija fil-lezzjonijiet tal-grammatika tal-Malti bħala l-ilsien nattiv. Biex inkun nista’ nara jekk iċ-ċajt fihx biżżejjed elementi mħaddma tal-grammatika biex jintuża għall-ewwel pass tal-proċess tat-tinqija, kelli nħejji kampjun ta’ ċajt. Il-ġbir tal-kampjun ta’ ċajt għamiltu billi ħadt ċajt mill-ġabra li għamilt għall-ewwel teżi tal-BA (Unuri). Madankollu mhux iċ-ċajt kollu f’din il-ġabra kien jgħodd għal din ir-riċerka u, għaldaqstant, żidt iktar ċajt, l-iktar mir-rivista Sagħtar. B’kollox ġbart 120 ċajta u dan il-kampjun ippermettieli nagħmel analiżi fuq iċ-ċajt biex nosserva liema mekkaniżmi grammatikali jidhru regolarment. Wara l-analiżi taċ-ċajt offrejt suġġerimenti ta’ pjanijiet tal-lezzjonijiet li l-introduzzjonijiet tagħhom huma mibnija fuq iċ-ċajt meħud mill-kampjun. Għaldaqstant stajt nuri kif iċ-ċajt għandu biżżejjed strutturi grammatikali biex jintuża fit-tagħlim tal-grammatika tal-ewwel lingwa u, fl-istess waqt, li jimmotiva lill-istudenti.