La Mamma dei Cretini è sempre Incinta JEU Ghasc Barra mhusc bilfors Mod Iehor (jeu Ahjar) : L-insularità f’Ulied in-Nanna Venut fl-Amerka ta’ Juann Mamo u f’What Happens in Brussels stays in Brussels ta’ Ġużè Stagno

Abstract

L-artiklu ta’ Emanuel Tanti jitkellem dwar l-insularità psikoloġika, soċjali, morali u politika f’żewġ rumanzi: Ulied in-Nanna Venut fl-Amerka ta’ Juann Mamo u What Happens in Brussels stays in Brussels ta’ Ġużè Stagno. Bħala spunt jieħu l-esej ‘Desert Islands’ ta’ Gilles Deleuze, li fih dan il-ħassieb jistqarr li l-insularità tmur lil hinn mil-limitazzjonijiet ġeografiċi marbutin mal-gżira: l-‘idea’ li l-abitanti jkollhom tal-ġżira li qed jgħixu fuqha hija importanti daqs il-gżira nnifisha. Għalhekk il-vjaġġi lejn l-Amerka u lejn il-Belġju ma joffrux il-ħelsien jew is-serħan mistenni mill-forma mentis li ssawwar fil-karattri ta’ dawn ir-rumanzi. Dwar dan jiġu ppreżentati żewġ perspettivi: dik tal-‘idea ġenerattiva’, li tilqa’ l-eteroġeneità u l-progress; u dik tal-‘idea replikatorja’, li xxekkel l-iżvilupp u tiffavorixxi l-insularità. Fl-aħħar nett jiġi diskuss il-kunċett tal-eroj, primarjament ir-rwoli li għandhom il-karattri ta’ Filiċ u Alexia fir-rumanzi ta’ Mamo u Stagno rispettivament. Dawn il-karattri jispikkaw għaliex jeżistu fil-periferija tal-grupp minħabba li ma jħaddnux il-fehmiet dominanti tiegħu.