It-traduzzjoni tal-Bibbja u l-ilsien Malti 1810-1850

Abstract

Is-suġġett li sa nitkellmu fuqu, diġà kitbu fuqu s-Sur Nin Cremona, Professur P.P. Saydon u Professur A. Bonnici . Dawn l-istudji tagħhom għandhom il-valur tagħhom għax fetħu t-triq ta' investigazzjoni u minħabba l-kontribut pożittiv tagħhom f'dan il-qasam; iżda għandhom in-nieqes tagħhom. Għal dak li għandu x'jaqsam mat-traduzzjoni tal-Bibbja u d-distribuzzjoni ~ tagħha Cremona qagħad fuq informazzjoni dokumentata, imma parzjali, li C. Dessoulavy ġabarlu mill-arkivji taċ-CMS.; Dessoulavy qagħad attent li ma jittrasrkrivix dokumenti offensivi għal widnejn il-Kattolċi; Bonnici interessa ruħu mid-distribuzzjoni ta!-Bibbja bil-Malti mill-aspett storiku, ġuridiku u pastorali bħala mezz ta' propaganda u proselitiżmu protestanti dak iż-żmien u qagħad fuq dokumentazzjoni uffiċċjali, ċivili u ekkleżjastika; Saydon, għal dik li hi informazzjoni storika, qagħad fuq ix-xogħol ta' dawn it-tnejn u baqa' l-aktar fuq il-valur letterarju u filoloġiku ta' dawn it-traduzzjonijiet.