Analiżi tematika u stilistika tad-diskorsi ta’ Dom Mintoff : 1977-1979

Abstract

Sentejn ilu, fl-20 ta’ Awwissu 2012, il-Perit Duminku Mintoff, magħruf aħjar bħala Dom Mintoff miet, iżda ħalla warajh ħidma mmarkata fl-istorja ta’ Malta minn wara t-Tieni Gwerra Dinjija sal-aħħar tas-Seklu Għoxrin. L-idea ta’ din it-teżi nibtet hekk kif f’dawn iż-żminijiet kienu ħafna li fakkru u tkellmu dwar Mintoff. Iżda innutajt li minkejja diversi kotba, programmi televiżivi, artikli u forom oħrajn ta’ informazzjoni li saru dwar Mintoff, ftit huma l-persuni li kitbu jew analizzaw fil-fond id-diskorsi tiegħu mimlijin b’tekniki figurattivi u rettoriċi. Dawn il-mekkaniżmi, kif se jidher fit-teżi kienu għodod b’saħħithom biex il-kelliem, matul id-diskorsi tiegħu bejn l-1977 – 1979, jipperswadi lis-semmiegħa tiegħu li Malta kellha tkun ħielsa. Iżda sabiex qabelxejn tingħaraf ir-relevanza tat-tekniki wżati minn Mintoff għal dan il-perjodu, li tant iddistingwih minn perjodi oħrajn, se jsir kumment qasir ta’ sfond politiku ta’ x’kien qiegħed iseħħ fis-snin sebgħin taħt it-tmexxija tiegħu.