Il-legati ta' Anġolin Spiteri : xewqat li firxu mir-Rabat ta' Għawdex sal-Imqabba f'Malta

Abstract

Meta kienet qed issir ir-riċerka minn Charles Farrugia għall-ktieb tiegħu Sicut Lilium, skopra l-festa tal-Madonna tal-Ġilju ġewwa Għawdex kif ukoll lill-kittieb Għawdxi Anthony Farrugia li għandu ferm għal qalbu l-kult lejn l-Immakulata Kunċizzjoni u dak kollu li jorbot miegħu. Minn dakinhar 'il hawn l-istess kollaborazzjoni wasslet għal artiklu dettaljat dwar il-festa tal-Madonna tal-Ġilju f'Għawdex. L-artiklu bl-isem 'Il-Festa tal-Imqaddsa Verġni tal-Ġilju fil-Knisja tal-Patrijiet Minuri Konventwali f'Għawdex' żvela dettalji mill-aktar interessanti u introduċa wkoll diversi personaġġi storiċi fosthom lil Anġolin Spiteri. Peress li r-riċerka kienet innovattiva u mill-qiegħ, ma kienx possibbli li fil-ktieb Sicut Lilium indaħħlu l-informazzjoni kollha li nstabet. Ġara li fl-istess ktieb l-editur Charles Farrugia ppubblika għall-ewwel darba informazzjoni minn volum miżmum f'kollezzjoni privata. Il-volum bl-isem 'Calendazione di messe dei legati annessi al Ven: e Giuspadronato Altare dell 'Incoronazione di Maria V sive di San Giuseppe eretto nella Santa Parrochiale Chiesa di Casal Micabbiba'. F'dan il-manuskritt jingħata prominenza l-legat li kien hemm fl-Imqabba ta' Anġolin Spiteri. Dan il-kuntratt ġie studjat f'aktar dettall wara l-pubblikazzjoni tal-ktieb. Dan l-artiklu hu frott dik l-intensifikazzjoni tar-riċerka f'din l-aħħar sena. Id-direzzjoni tirringrazzja lil Charles Farrugia, Anthony Farrugia kif ukoll Anthony Bonello li għen fil-qari tal-provi ta' dan l-artiklu u lil Patri Ruggier Camilleri għat-traskrizzjoni mil-Latin.