L-ilsien Malti għal qalbi

Abstract

Ġieli kellek bżonn xi kanzunetta bil-Malti biex issemmagħha lit-tfal jew tkantaha magħhom? Ilek tfittex kif tista’ tikteb bl-ittri tal-Malti mil-laptop jew mit-tablet? Taf xi ħbieb tiegħek barranin li jixtiequ jitgħallmu l-Malti? Tixtieq tgħin lin-neputijiet iż-żgħar jitgħallmu l-Malti jew f’xi proġett tal-iskola? Għandek għal qalbek il-letteratura Maltija u tixtieq issib minn fejn tissellef ktieb tajjeb jew tisma’ aktar dwar l-awturi favoriti tiegħek? Dan il-ktejjeb hu maħsub propju għalhekk għax jiġborlok kollox f’post wieħed u jservik bħala punt ta’ referenza għall-kuntatti mal-għaqdiet tal-Malti differenti, u s-siti elettroniċi bir-riżorsi u l-korsijiet tal-Malti li ilek tfittex. Fih issib ukoll tagħrifiet kurjużi fuq ilsienna u xi logħob relatat. Hawn anke lista tar-rivisti ewlenin li joħorġu u li tista’ taqrahom mill-kumdità ta’ darek. Dan il-ktejjeb hu parti mill-kampanja l-ilsien Malti għal qalbi mtellgħa mill-Uffiċċju tal-President ta’ Malta u l-għaqdiet tal-Malti.